أحلام الشباب
************
أنا شاب مصري بعيش وبحلم زي أي شاب تاني
وهبت كل سنين حياتي لحب مصر وللأمـانـي
من كام سنة قلت إني ألجأ للعلام كسلاح في إيـدي
ولما اخلص هالقى ألف وظيفة حلوة تليق عشانـي
وفضلت أحلم إني أحب وارتبط باللي هويتهــا
وبعدها تبقى الحيــاة بصورة أحلى وشكل تاني
وسنيني دارت والليالي بعدما طالت عـــليـَّا
صحيت لقيت كل اللي كان أحلام جميلة مش عشاني
صحيت لقيت ما فيش وظيفة تليق لي أو ما متليقش ليَّا
ولو لقيت تبقى الوظيفة فواعلي أو سفاح وجاني
وإن يوم لقيت أجمل وظيفة قريبة لي بأجر مجزي
إزاي راح اجمع يوم ما بيني وبين حبيبتي وفين مكاني؟
إن كان معاي شبكتك قولي منين مهرك يا روحـي
ولو لقيت مهرك معايا الشقة مش مستنيانـي
وأن قلت أكافح لجل أجيبلك كل شيء يا نور عينيا
ازاي حيستناني عمري والسنين زي الثواني
أنا باختصار اتحطمت مركب طموحي وأمنياتي
جوا طوفان جيل سبقني حب نفسه وكان أناني
مركبي اللي عشت أكافح لجل ما توصل بي سالمة
صحيت لقيتها مكانها واقفة ومستحيل توصل مواني
ورغم ده أنا لسة حاسس بالأمل ثابت في قلبي
ولسة حاسس بالتحدي مالي إحساسي وكياني
لسة حاسس إني قادر اجعل الأشواك دي ورد
و لسة حاسس إني قادر ابدر الأحزان أغاني
بس مين يسمع غنايا؟ ويبدر الأفراح حدايا؟
وقولوا مين يزرع معايا ولسة فيه في الدنيا جاني
************ ********* *
بقلم أمير الدموع
أريد فقط أن أكون قلباً يحمل
إنسـانـاً
هناك تعليق واحد:
بجد انت رائع
وربنا يخليلك موهبتك يا رب
ومش عشان اسمى بنت مصريه فأنا فخوره باللى بيحصل فى البلد
لأ دا انا اسفه غايه التأسف عللى فيها
صدقنى مصر بريئه من افعال السفهاء
الحراميه والنصابين
ربنا يكرمك وللاحسن على طول
إرسال تعليق